February 3, 2023

28.59 மில்லியன் கிலோ தேயிலையை
இந்தியாவிடமிருந்து யுஏஇ இறக்குமதி செய்துள்ளது

புது தில்லி, டிச.5

இந்தியாவிடமிருந்து தேயிலை அதிகம் இறக்குமதி செய்யும் நாடுகள் பட்டியலில் ஐக்கிய அரபு அமீரகம் 2வது இடத்துக்கு முன்னேறியுள்ளதாக செய்திகள் வெளியாகியுள்ளது. இது குறித்து விரிவான செய்தியாவது:

கடந்த ஜனவரி முதல் செப்டம்பர் வரையிலான காலகட்டத்தில் 28.59 மில்லியன் கிலோ தேயிலையை இந்தியாவிடம் இருந்து ஐக்கிய அரபு அமீரகம் இறக்குமதி செய்துள்ளது. கடந்தாண்டு இதே காலகட்டத்துடன் ஒப்பிடுகையில் இது 159 சதம் அதிகமாகும்.

மேலும், ரஷியா மற்றும் முன்னாள் சோவியத் நாடுகள் கூட்டமைப்பு இந்தப்பட்டியலில் முதலிடத்தில் உள்ளது. இந்நாடுகளுக்கு கடந்த ஜனவரி முதல் செப்டம்பர் வரை 38.06 மில்லியன் கிலோ தேயிலை ஏற்றுமதி செய்யப்பட்டுள்ளது. இதற்கு முன்பு ஈரான், ஈராக் ஆகிய நாடுகள் இந்தியாவில் இருந்து அதிக தேயிலை இறக்குமதி செய்து வந்தது குறிப்பிடத்தக்கது. ஈரான் மீது அமெரிக்கா விதித்த பொருளாதாரத் தடைகள், இராக்கில் ஏற்பட்ட உள்நாட்டுப் பிரச்னைகள் காரணமாக அந்நாடுகளுக்கான ஏற்றுமதி வெகுவாக பாதிக்கப்பட்டது.

நாட்டின் ஒட்டுமொத்த தேயிலை ஏற்றுமதி கடந்த ஜனவரி முதல் செப்டம்பர் வரை 165.58 மில்லியன் கிலோவாக அதிகரித்துள்ளது. கடந்த ஆண்டுடன் ஒப்பிடுகையில் இந்த ஆண்டு தேயிலை ஏற்றுமதி அதிகரித்துள்ளது. உலக அளவில் தேயிலை நுகர்வு அதிகம் உள்ள நாடாக சீனா திகழ்கிறது. அங்கும் இந்திய தேயிலையை ஏற்றுமதி செய்ய முயற்சிகள் மேற்கொள்ளப்பட்டு வருகின்றன.

Spread the love