October 4, 2022

26 தகைசால் பள்ளிகள் மற்றும் 15 மாதிரிப் பள்ளிகளை
முதல்வர் ஸ்டாலின் முன்னிலையில்
தில்லி முதல்வர் தொடங்கி வைத்தார்

சென்னை, செப்.5

தமிழக முதல்வர் மு.க.ஸ்டாலின் முன்னிலையில், தில்லி முதல்வர் அரவிந்த் கெஜ்ரிவால் சென்னை, பாரதி பெண்கள் கல்லூரியில் நடைபெற்ற விழாவில், அரசுப் பள்ளி மாணவர்களுக்கு பாடத்திட்டம் சார்ந்தும் அதைக் கடந்தும் முழுமையான கல்வியை வழங்கிடும் வகையில் தமிழ்நாட்டிலேயே முதல் முறையாக 26 தகைசால் பள்ளிகளையும், அரசுப் பள்ளிகளில் படிக்கும் மாணவர்கள் கல்வி, நுண்கலை மறறும் விளையாட்டுத் துறைகளில் சிறந்து விளங்குவதற்கான வாய்ப்பை வழங்கும் வகையில் 15 மாதிரிப் பள்ளிகளையும் தொடங்கி வைத்தார்.

மாணவர்களின் கற்றலுக்கும், திறன் வெளிப்பாட்டிற்கும் முக்கிய காரணமாக விளங்குவது அவர்கள் பயிலும் பள்ளிகளில் உள்ள வசதிகளும், ஆசிரியர்களும், பள்ளித் தலைமையும்தான். மாணவர்கள் அடையவேண்டிய இலக்கையும் செல்லும் திசையையும் உறுதிசெய்தல், திறன்களை வளர்த்துக்கொள்ள வசதிகளை ஏற்படுத்தித் தருதல், ஆசிரியர் மாணவர் இடையே பிணைப்புடன் கூடிய கற்றல் – கற்பித்தல் ஆகியவை மாணவர்களின் முன்னேற்றத்திற்கு முக்கிய காரணிகள் ஆகும்.

இந்த இலக்கை அடைய, பாடத்திட்டம் மட்டுமல்லாது, ஒருங்கிணைந்த நூலகம், விளையாட்டு, கலைகள், இலக்கியம் என அனைத்தும் சேர்ந்த ஒரு முழுமையான கல்வி பள்ளிகளில் தேவைப்படுகிறது. நேரிடையாகவும், இணைய வசதிகளை பயன்படுத்தியும் ஆசிரியர்களுக்கு அளிக்கப்படுகின்ற பல்வேறு பயிற்சிகளின் விளைவாகவும் வருங்காலத்தில் மாணவர்கள் பெருமளவில் பலனடைந்து முன்னேற்றம் காண்பார்கள்.

அரசுப் பள்ளி மாணவர்களின் கல்வித் தரத்தினை மேலும் உயர்த்துவதற்காக, முதற்கட்டமாக திருவள்ளூர் மாவட்டம் – பூந்தமல்லி, காமராஜ் நகர், சென்னை மாவட்டம் – தி.நகர், அசோக் நகர், காஞ்சிபுரம் மாவட்டம் – பெரிய காஞ்சிபுரம், செங்கல்பட்டு மாவட்டம் – காட்டாங்குளத்தூர், நந்திவரம், இராணிப்பேட்டை மாவட்டம் – ஆற்காடு, வேலூர் மாவட்டம் – வேலூர், திருப்பத்தூர் மாவட்டம் – நாட்டாரம்பள்ளி, வாணியம்பாடி, தருமபுரி மாவட்டம் – தருமபுரி, விழுப்புரம் மாவட்டம் – விழுப்புரம், சேலம் மாவட்டம் – சேலம் நகரம், குகை, ஈரோடு மாவட்டம் – ஈரோடு, நீலகிரி மாவட்டம் – கூடலூர், கோயம்புத்தூர் மாவட்டம் – கோயம்புத்தூர், திண்டுக்கல் மாவட்டம் – பழனி, கரூர் மாவட்டம் – குளித்தலை, திருச்சிராப்பள்ளி மாவட்டம் – திருச்சிராப்பள்ளி, கடலூர் மாவட்டம் – கடலூர், நாகப்பட்டினம் மாவட்டம் – நாகப்பட்டினம், தஞ்சாவூர் மாவட்டம் – பட்டுக்கோட்டை, சிவகங்கை மாவட்டம் – திருபுவனம், மதுரை மாவட்டம் – மதுரை தெற்கு, தூத்துக்குடி மாவட்டம் – கோவில்பட்டி, திருநெல்வேலி மாவட்டம் – திருநெல்வேலி, கன்னியாகுமரி மாவட்டம் – அகஸ்தீஸ்வரம் கிருஷ்ணகிரி மாவட்டம் – கிருஷ்ணகிரி, திருப்பூர் மாவட்டம் – திருப்பூர் ஆகிய இடங்களில் உள்ள அரசுப் பள்ளிகள் தகைசால் பள்ளிகளாக தேர்ந்தெடுக்கப்பட்டு, தொடங்கப்படுகிறது.

தகைசால் பள்ளியில் ஆறாம் வகுப்பு முதல் பயிலும் மாணவர்களுக்கு வழிகாட்டிகள், பல்துறை வல்லுநர்கள் பங்கேற்று உரையாடும் கோடை முகாம்கள், பல்வேறு கலைகளில் தங்கள் திறன்களை வளர்த்துக்கொண்டு கற்றலின் மகிழ்வை அடைய வழிவகை செய்யப்படும்.

ஆசிரியரின் திறமைகளும், வெளிப்பாடுகளும் மாணவர்களின் முன்னேற்றத்தோடு நெருங்கிய தொடர்புடையதாக உள்ளதால், ஆசிரியர்கள் தங்கள் திறன்களை வளர்த்துக்கொள்ளும் வகையில், பயிற்சி வகுப்புகளில் சேசர்ந்து பயனடைய ஊக்குவிக்கப்படுவர். மேலும், அவ்வகுப்புகளில் துறைசார் நிபுணர்களும், தொழிற்துறை வல்லுநர்களும் பங்கேற்று அவர்க¼ளாடு கலந்துரையாடுவர். நாட்டின் முக்கியமான நிறுவனங்களை நேரில் சென்று பார்வையிடவும் வழிவகை செய்யப்படும்.

அனைத்து வசதிகளும் கொண்ட நூலகம் மற்றும் அர்ப்பணிப்புணர்வோடு பணியாற்றும் சிறந்த நூலகர்கள் வாயிலாக மாணவர்களின் வாசிப்புப் பழக்கம் மமம்படுத்தப்படும். விளையாட்டில் ஈடுபடும் மாணவர்களுக்கு தொழில்முறை பயிற்சியாளர்கள் வாயிலாக அவர்களுடைய விளையாட்டுச் செயல்பாடுகளில் முன்னேற்றத்தை உண்டாக்கி அவர்களது மனநலமும், உடல்நலமும் பேணப்படும். கலைகள், நாடகங்கள் மற்றும் இசை ஆகியவற்றில் போட்டிகள் நடத்தப்பட்டு மாணவர்களின் தன்னம்பிக்கையும் வெளிப்பாட்டுத் திறனும் வளர்க்கப்படும். இவற்றோடு மெய்நிகர் டிஜிட்டல் உலகத்தோடு போட்டியிடும் வகையில் மாணவர்களுக்கு பயிற்சிகள் அளிக்கப்படும். இத்திட்டம் வருங்காலத்தில் படிப்படியாக அனைத்து மாவட்டத்திற்கும் விரிவுபடுத்தப்படும்.

அரசுப் பள்ளிகளில் படிக்கும் மாணவர்கள் கல்வி, நுண்கலை மற்றும் விளையாட்டுத் துறைகளில் சிறந்து விளங்குவதற்கான வாய்ப்பை வழங்கும் வகையிலும், அரசுப் பள்ளி மாணவர்கள் சிறந்த கல்வி நிறுவனங்களில் தொழில்முறை கல்வி பிரிவுகளில் (அறிவியல், தொழில் நுட்பம், பொறியியல், கலை மற்றும் மருத்துவம்) சேர்ந்து பயிலும் வாய்ப்பினை உறுதி செய்யும் வகையிலும் மாதிரிப் பள்ளிகள் உருவாக்கப்பட்டு செயல்பட்டு வருகின்றன.

அந்த வகையில், இந்த கல்வியாண்டிற்கு சென்னை, மதுரை, திருப்பத்தூர், நீலகிரி, திருவாரூர், சிவகங்கை, ஈரோடு, இராமநாதபுரம், திருநெல்வேலி, கோயம்புத்தூர், திருவள்ளூர், வேலூர், நாகப்பட்டினம், இராணிப்பேட்டை ஆகிய மாவட்டங்களில் உள்ள 15 அரசுப் பள்ளிகள் மாதிரி பள்ளிகளாக தொடங்கப்படுகிறது. அரசின் இட ஒதுக்கீட்டுக் கொள்கையைப் பின்பற்றியும், மாணவர்களின் கல்வி, கலை மற்றும் விளையாட்டு போன்ற கூடுதல் பாடத்திட்டங்கள் உட்பட அவர்களின் ஒட்டுமொத்த செயல்திறனை அடிப்படையாகக் கொண்டும் மாதிரிப் பள்ளிகளில் சேர்க்கை நடைபெறுகிறது. மாதிரிப் பள்ளிகள் ஒவ்வொரு மாணவருக்கும் அவர்களின் திறன் மற்றும் மனோதத்துவ அடிப்படையில் தொழில் வாய்ப்புகளை மேற்கொள்வது பற்றிய 3ஆழமான விழிப்புணர்வை வளரப்பதற்கு ஒரு தனித்துவமான தொழில் வழிகாட்டுதல் வாய்ப்பினையும் வழங்குகிறது.

Spread the love