November 29, 2022

பணக்காரர்கள் எண்ணிக்கை 18 லட்சமாக அதிகரிப்பு
பிரைஸ் ஆய்வு தகவல்

புது தில்லி, நவ.3

இந்தியாவில் பணக்காரர்கள் எண்ணிக்கை 18 லட்சமாக அதிகரித்துள்ளதாக ஆய்வு தகவல்கள் வெளியாகியுள்ளது.

இது குறித்து விரிவான செய்தியாவது: இந்தியாவின் நுகர்வோர் பொருளாதாரம் மீதான மக்கள் ஆராய்ச்சி (பிரைஸ்) என்ற சிந்தனை அமைப்பின் சார்பில், “இந்தியாவின் நடுத்தர பிரிவு மக்கள் வளர்ச்சி’ என்ற பெயரில் ஒரு ஆய்வு மேற்கொள்ளப்பட்டது. கடந்த 1994-95 முதல் 2020-21 வரை இந்தியர்களின் பொருளாதார நிலை எப்படி உயர்ந்துள்ளது என்பது குறித்த புள்ளிவிவரங்கள் சேகரிக்கப்பட்டன. இதில், 2021-ல் வருமான அடிப்படையில் மக்கள் 7 குழுக்களாக பிரிக்கப்பட்டனர்.

குறைந்தபட்சமாக குடும்ப ஆண்டு வருமானம் ரூ.1.25 லட்சத்துக்குக் கீழ் உள்ளவர்கள் மிகவும் வறுமையானவர்கள் என்றும் அதிகபட்சமாக ரூ.2 கோடிக்கு மேல் குடும்ப வருமானம் கொண்டவர்கள் சூப்பர் பணக்காரர்கள் என்றும் வகைப்படுத்தப்பட்டனர். ரூ.5 லட்சம் முதல் ரூ.30 லட்சம் வரையில் குடும்ப ஆண்டு வருவாய் ஈட்டுவோர் நடுத்தர பிரிவு மக்கள் என பிரிக்கப்பட்டனர்.

இதன்படி, 1994-95-ல் 98 ஆயிரமாக இருந்த சூப்பர் பணக்கார குடும்பங்கள் எண் ணிக்கை, 2021-ல் 18 லட்சமாக அதிகரித்துள்ளது. நடுத்தர பிரிவு மக்கள் எண்ணிக்கை 14-லிருந்து 31% ஆக உயர்ந்துள்ளது. அதாவது நாட்டு மக்களில் 3-ல் ஒருவர் நடுத்தர பிரிவில் உள்ளனர். மிகவும் வறுமையானவர்கள் கார் வாங்க முடியாத நிலையில் உள்ளனர். ரூ.1.25 லட்சம் முதல் ரூ.5 லட்சம் வரை வருவாய் ஈட்டும் 10-ல் 5 பேர் மோட்டார் வாகனம் வைத்துள்ளனர். ரூ.5 லட்சம் முதல் ரூ.15 லட்சம் வரை வருவாய் ஈட்டும் 10-ல் 3 குடும்பத்தினர் கார் வைத்துள்ளனர். ரூ.30 லட்சத்துக்கு மேல் வருவாய் ஈட்டும் பணக்கார குடும்பத்தினர் அனைவரும் கார் வைத்துள்ளனர். இவ்வாறு அந்த ஆய்வில் தெரிவிக்கப்பட்டுள்ளது.

Spread the love