February 3, 2023

இலவச ரேசன் திட்டம் ஓராண்டுக்கு நீட்டிப்பு மத்திய அமைச்சரவை கூட்டத்தில் முடிவு

புது தில்லி, டிச.24

2023ம் ஆண்டு டிசம்பர் மாதம் வரை நாட்டின் 80 கோடிக்கும் மேற்பட்டோருக்கு ரேசன் கடைகள் மூலம் இலவச உணவு தானியம் வழங்கும் திட்டம் தொடரும் என மத்திய அரசு அறிவித்துள்ளதாக செய்திகள் வெளியாகியுள்ளது.

இது குறித்து விரிவான செய்தியாவது: 2020ஆம் ஆண்டில் கோவிட் பெருந்தொற்று பரவல் ஆரம்பித்த நிலையில், மக்களின் வாழ்வாதாரத்தை கருத்தில் கொண்டு மேற்கண்ட உணவு தானியங்கள் இலவசமாக விலையின்றி வழங்க மத்திய அரசு உத்தரவிட்டது. பிரதமரின் ஏழைகள் நலன் திட்டம் என்ற பெயரில் இது செயல்படுத்தப்பட்டது. தற்போது வரை இந்த இலவச ரேசன் திட்டம் தொடரும் நிலையில், இது மேலும் ஓராண்டுக்கு நீட்டிக்கப்பட்டுள்ளது.

பிரதமர் மோடி தலைமையிலான மத்திய அமைச்சரவை கூட்டம் நடைபெற்றது. அதில் முக்கிய முடிவுகள் எடுக்கப்பட்டு அது தொடர்பான அறிவிப்புகள் வெளியாகின. அதன்படி, இந்த பிரதமர் ஏழை நலன் ரேசன் திட்டம் உணவு பாதுகாப்பு சட்டத்துடன் இணைக்கப்பட்டு வரும் டிசம்பர் 2023 வரை இலவச உணவு தானியம் திட்டம் அமல்படுத்தப்படும் என மத்திய அரசு அறிவித்துள்ளது.

மேலும், இந்த திட்டத்தின் மூலம் நாட்டில் சுமார் 81.3 கோடி மக்கள் இலவச உணவு தானியம் பெறுவார்கள்.இதற்கான முழு செலவையும் மத்திய அரசு ஏற்கும் என மத்திய அரசு தெரிவித்துள்ளது. எனவே, உணவு பாதுகாப்பு திட்டத்தின் பட்ஜெட் ரூ.2 லட்சம் கோடியாக உயர்த்தப்பட்டுள்ளதாக அரசு தெரிவித்துள்ளது. நாட்டின் பணவீக்க விகிதத்தை கருத்தில் கொண்டு மத்திய அரசு புத்தாண்டு பண்டிகை காலத்தில் இந்த அறிவிப்பை வெளியிட்டுள்ளது.

Spread the love